Hakimlər Komitəsində nə baş verir? – Məmmədov Stuxlikin yanından uzaqlaşdırıldı

Hakimlər Komitəsində nə baş verir? – Məmmədov Stuxlikin yanından uzaqlaşdırıldı

AFFA Hakimlər və Hakim-inspektorlar Komitəsinin sədri Firts Stuxlikin köməkçisi olan Elçin Məmmədov vəzifəsindən ayrılıb.
 
Sport7.az xəbər verir ki, Məmmədov bundan sonra yalnız Futzal Federasiyandakı işinə davam edəcəyini söyləyib.

"Futbol+” qəzetinə açıqlamasında sabiq referi öz istəyi ilə istefa verdiyini deyib: "Mediada yazılıb ki, işdən qovulmuşam. Bu, belə deyil. Hamı hər şey yazır. Öz istəyimlə istefa vermişəm. Həm AFFA Hakimlər və Hakim-inspektorlar Komitəsində, həm də Futzal Federasiyasında çalışırdım. İki işi bir yerdə görmək alınmırdı. Bu üzdən ərizəmi yazıb, ordan ayrıldım. Mənə etimad göstərdiklərinə görə AFFA rəsmilərinə, Elxan Məmmədova təşəkkürümü bildirirəm. Futzal Federasiyasındakı vəzifəmə davam edəcəm. Orda hakimlərin əlaqələndiricisi kimi çalışacam. Bir daha deyirəm, məni işdən çıxarmayıblar, özüm istefa vermişəm”.

Qeyd edək ki, mediada dolaşan xəbərlərdə AFFA-nın fəaliyyətində ciddi nöqsanlara yol verən sabiq referini cəzalandırdığı bildirilib. Qurumun Elçin Məmmədovu Hakimlər və Hakim-İnspektorlar Komitəsi üzvlüyündən kənarlaşdırmaq haqda qərar verdiyi vurğulanıb. Məmmədovun özünə aid olmayan məsələlərə qarışması və işinə ciddi yanaşmaması səbəbindən uzaqlaşdırıldığı deyilir. Xəbərlərdə quruma Elçin Məmmədovun əvəzinə sabiq FİFA referisi, hakim-inspektor Babək Quliyev gətirildiyi bildirilib.

İşindən ayrılan Məmmədovu sabiq FIFA referisi Babək Quliyev əvəzlədiyi deyilir. Babək bəy "Futbol+”in soruğusuna cavabında bu məsələnin hələ dəqiqləşmədiyini vurğulayıb: "Elçin Məmmədov öz istəyi ilə Hakimlər və Hakim-İnspektorlar Komitəsindəki işindən ayrıldı. Hazırda onun yerinə heç kim təyin olunmayıb. Buna AFFA İcraiyyə Komitəsinin növbəti iclasında qərar veriləcək. Qurum kimi bu vəzifəyə layiq görərsə, o da işinin icrasına başlayacaq. Belə təyinatlar İcraiyyə Komitəsinin qərarı ilə həyata keçirilir. Rəsmi təyinat olan kimi ictimaiyyətə bu barədə məlumat veriləcək”.

Babək bəy Elçin Məmmədovun istefasından da danışdı: "O, işlərinin çoxluğunu əsas tutaraq rəsmi şəkildə ərizə verərək vəzifəsindən getdi. Mediada yazılanlar yox, Elçin Məmmədovun verdiyi açıqlama doğrudu. Kimsə onu işindən azad etmədi. Yenə deyirəm, işlərinin çoxluğunu əsas gətirərək belə qərar verdi”.

Göründüyü kimi, aylar, illər keçir. Amma Hakimlər Komitəsindəki müəmmalar, dolaşıq işlər, vəzifə və mənsəb davası bitmir. Mövzunu yenə də diqqətdə saxlayacağıq.

Sport7.az

OXŞAR XƏBƏRLƏR

XƏBƏRLƏR
BLOGLAR