Roberto Bordin:

Roberto Bordin: "Komandam hər dəfə qol buraxandan sonra ayılır"

"Neftçi"nin baş məşqçisi Roberto Bordin Premyer Liqanın 4-cü turunun "Qarabağ” klubu ilə oyunusonrası mətbuat konfransında fikirlərini açıqlayıb.
 
Sport7.az xəbər verir ki, italiyalı mütəxəssis məğlubiyyətə baxmayaraq, komandanın hədəfinin dəyişmədiyini, çempionluğa oynadığını bildirib: "İstədiyimiz alınmadı. Çünki futbolçularımız istədiyimiz ritmdə oynaya bilmədilər. Müdafiədə yaxşı oynadığımız vaxtda azlıqda yaxalanıb qapımızdan qol buraxdıq. İlk qoldan sonra rəqib qapısı ağzında qol epizodları yaratdıq. Cavab qolunu vura biləcəyimiz zamanda isə qapımızda daha bir qol gördük. İkinci qoldan sonra komandam irəli atıldı və rəqibə əks-hücum şəraiti yaratdı. Hətta 2:0-dan sonra da təhlükəli vəziyyətlər yaratdıq. "Qarabağ” kimi komandaya qarşı 90 dəqiqə yüksək tempdə oynamaq lazımdır. Komandam hər dəfə qol buraxandan sonra ayılır. Bunun nədən irəli gəldiyini bilmirəm”.

Sonra baş məşqçi jurnalistlərin suallarını cavablandırıb: "Deməzdim ki, hər künc zərbəsindən sonra rəqib qapıçı topu götürürdü. Petrov ilə Geryenin başla zərbələrini xatırlamaq kifayətdir. Mən peşəkaram, hər zaman 100 faiz çalışmışam və çalışıram da. Komanda udar da, uduzar da. Buna görə karyerama zərbə gələcəyi haqda heç nə deyə bilmərəm. Keçənilki kimi, bu dəfə də hədəfimiz eynidir, çempionluğa oynayırıq. Sadəcə, bu dəfə yaxşı başlamamışıq. Amma bu, hədəfimizin dəyişməsi anlamına gəlmir. Bir ay əvvələ qayıtsaq, Tula "Arsenal”ına qarşı hər iki oyunu çox yaxşı keçirmişdik. Çalışıram komandamı həminki vəziyyətə gətirib çıxarım. Yəni bir ay əvvəlki kimi daha da istəkli olsunlar, daha da ürəklə vuruşsunlar. Bu gün sanki o qədər də istəkli deyildilər. Raufla Dabo yerdəyişmə edib, Miçeli bağlayırdılar. Bu, müdafiə planında belə idi, amma hücum planında ikisini də irəli atmağa məcbur idim”.
 
Sport7.az

OXŞAR XƏBƏRLƏR

XƏBƏRLƏR
BLOGLAR