"Zəif hesab etdiyimiz rəqib də maraqlı oyun göstərdi" - Millimizin üzvü

Azərbaycan milli komandasının üzvü Tyaqo Bolinha Avropa çempionatının seçmə mərhələsi haqda fikirlərini bölüşüb.
 
Sport7.az xəbər verir ki, o, Futzal Federasiyasının mətbuat xidmətinə müsahibə verib.

- 6 oyun və 16 xal. Qrup mərhələsini necə başa vurduq?

- Əvvəlcə qazanılan uğur münasibəti ilə komanda yoldaşlarımı, azarkeşlərimizi təbrik edirəm. Əla nəticə oldu. Biz qarşıya qoyulan məqsədə nail olduq. Özü də heç bir oyunda məğlub olmadan və qrup lideri kimi. Yaxşı, maraqlı oyunlar keçirtdik.

- Hansı oyun daha yaddaqalan oldu?

- Oyunların hamısı maraqlı keçdi. Hamı Yunanıstanın zəif komanda olduğunu düşünürdü. Reytinqə əsaslansaq, belədir. Onlar ilkin mərhələdən mübarizəyə başlayıb və bura qədər yüksəliblər. Ancaq hər iki oyun göstərdi ki, zəif hesab etdiyimiz rəqib də meydanda kifayət qədər maraqlı oyun nümayiş etdirdi, sona qədər müqavimət göstərməyə, qol vurmağa çalışdı. Hətta onların Moldova yığması ilə heç-heçəsi də dediyimə sübutdur. Slovakiya ilə oyunlarımız maraqlı keçdi. Bu rəqibimiz qrupda ikinci yeri tutdu və Avropa çempionatının final mərhələsinə birbaşa vəsiqə qazandı. Yəni maraqlı qrupda yer almışdıq. Hər bir oyun bir-birindən maraqlı və məsuliyyətli idi. Slovakiya ilə oyunları nisbətən fərqləndirərdim.

- Bir oyunda heç-heçə etdik. Ondan necə, qaçmaq mümkün idi?

- Maksimum xal toplamaq olardı, Slovakiya ilə səfər oyununda heyətimizdəki itkilər olmasa idi. Onlarla görüş çox çətin alındı. Mən, Hadi, Vilela, Vassoura zədə səbəbindən komandamıza kömək edə bilmirdik. Bu qədər itkiyə rəğmən xalla dönmək, uğurlu nəticə idi.

- Yeni format necə, turnirə marağı artıracaqmı?

- Əlbəttə, oyunların ev-səfər prinsipi ilə keçirilməsi çox maraqlıdır. Əvvəllər ancaq bir həftə ərzində bütün görüşlər keçirilirdi və bu mərhələyə yekun vurulurdu. İndi isə 3 ay davam etdi. Həm də bütün komandalar üçün şans yaranmışdı. Məncə, oyunlar azarkeşlərlə keçirilməyə başlayan zaman bunun maraqlı olduğunu görəcəyik. Final mərhələsi də maraqlı olacaq. 16 komanda bu dəfə qalib olmaq üçün yarışacaq. Təbii ki, çətin olacaq. Çünki ora daha güclü komandalar vəsiqə qazanıb. Uğur qazanmaq üçün yaxşı hazırlıq keçməliyik. Ona qədər zamanımız var. Yoldaşlıq oyunlarında gücümüzü sınamalıyıq.
 
Sport7.az

OXŞAR XƏBƏRLƏR

XƏBƏRLƏR
BLOGLAR